Дар асоси Резолютсияи Ассамблеяи Генералии Созмони Милали Муттаҳид аз 9 апрели соли 1985 ва қарори ҷаласаи нахустини Шўрои машваратӣ оид ба ҳимояи ҳуқуқи истеъмолкунандагон дар давлатҳои иштирокчиёни – Иттиҳоди Давлатҳои Мустақил аз 25 ноябри соли   2011, ҳамасола 15-уми март Рўзи байналмилалии ҳимояи ҳуқуқи истеъмолкунандагон ҷашн гирифта мешавад.

Тоҷикистон низ ҳамчун узви комилҳуқуқи Созмони  Милали Муттаҳид ва иштирокчии – Иттиҳоди Давлатҳои Мустақил Рўзи байналмилалии ҳимояи ҳуқуқи истеъмолкунандагонро таҷлил менамояд.

Бо мақсади дар сатҳи баланд таҷлил намудани Рўзи байналмилалии ҳимояи ҳуқуқи истеъмолкунандагон, санаи 24 феврали соли ҷорӣ дар Хадамоти зиддиинҳисории назди Ҳукумати Ҷумҳурии Тоҷикистон, ки ҳамчун мақоми ваколатдори давлатӣ фаъолияти дигар мақомоти давлатиро дар самти ҳимояи ҳуқуқи истеъмолкунандагон ҳамоҳанг месозад, ҷаласаи корӣ баргузор гардид. Дар кори ҷаласа намояндагони  мақомоти ваколатдори давлатӣ дар самти ҳимояи ҳуқуқи истеъмолкунандагон иштирок намуданд.

Дар кори ҷаласа Нақшаи чорабиниҳои байниидоравӣ, ки бо ин мақсад аз ҷониби Хадамоти зиддиинҳисории назди Ҳукумати Ҷумҳурии Тоҷикистон таҳия ва тасдиқ карда шудааст, баррасӣ гардида, тадбирҳои муштарак ҷиҳати сари вақт таъмини намудани чорабиниҳои пешбинишуда, ки ба баланд бардоштани маърифатнокии истеъмолкунандагон ва боз ҳам беҳтар намудани сатҳу сифати хизматрасониҳо нигаронида шудаанд, муайян карда шуданд.